Wanafunzi Laki Tisa Kumi Na Saba Elfu Wameanza Mitihani Yao Ya Kumaliza Elimu Ya Msingi Nchini Tanzania.

TAREHE 06 SEPT 2017,

Wanafunzi Wa Darasa La Saba Wakiwa Kwenye Mtihani Wa Kuhitimu Elimu Ya Msingi

Jumla ya wanafunzi laki tisa kumi na saba elfu na tisini, leo wameanza mitihani yao ya kuhitimu darasa la saba mwaka huu kutoka shule zipatazo elfu kumi na sita mia tano na themanini na tisa hapa nchini.

Taarifa hiyo imetolewa na waziri wa nchi ofisi ya rais tawala za mikoa na serikali za mitaa Mh George Simbachawene wakati akizungumza na waandishi wa habari mjini Dodoma kuhusu kukamilika kwa taratibu zote za kuanza mitihani hiyo kwa wanafunzi wa darasa la saba mwaka huu.

Amesema kuwa mitihani hiyo itaanza leo na itakamilika siku ya kesho kwa wanafunzi kutoka Tanzania bara na maandalizi yote yameshakamilika,ambapo pia ametumia nafasi hiyo kuwataka baadhi ya watendaji wanaofanya ubabaishaji wa kuwalipa wasimamizi wa mitihani posho zao kuacha tabia hiyo mara moja na atakayebainika atachukuliwa hatua kali za kisheria.

Hata hivyo katika zoezi hilo zaidi ya shilingi bilioni 29zimepelekwa kwa ajili ya kuwalipa wasimamizi wa mitihani hiyo nchi nzima.