MAGAIDI WASIOPUNGUA 12 WAMEUAWA NA JESHI LA MISRI KASKAZINI MWA RASI YA SINAI.

CAIRO.

12 February, 2018.

Jeshi la Misri likiwa katika operesheni kubwa dhidi ya ugaidi kaskazini mwa Rasi ya Sinai.

Jeshi la Misri limesema kuwa limeua magaidi wasiopungua 12 na kuwatia mbaroni wengine wapatao 100 katika opereseheni kubwa iliyoanzishwa na jeshi hilo kaskazini mwa Rasi ya Sinai.

Taarifa hiyo ya jeshi la Misri imetolewa leo Jumatatu, siku moja baada ya jeshi hilo kutangaza jana kwamba limeua magaidi 16 katika opesheni kama hiyo.

Taarifa ya jeshi la Misri imeongeza kuwa ndege za kivita za nchi hiyo zimeshambulia maeneo 60 yakiwemo magari, maghala ya silaha na vituo vya mawasiliano vya magaidi.

Pia taarifa ya jeshi hilo iliyotolewa jana imesema kuwa, washukiwa wengine 30 wametiwa mbaroni katika operesheni hiyo ya kijeshi iliyoanza katika Rasi ya Sinai tangu siku ya Ijumaa kwa amri ya Rais Abdul Fattah al Sisi wa nchi hiyo.

Kwa miaka mingi sasa jeshi la Misri limekuwa likipambana na magenge yenye silaha katika Peninsula ya Sinai yaliyoshadidisha mashambulizi yao tangu jeshi la nchi hiyo lilipompindua Mohammad Morsi, rais wa kwanza kabisa kuchaguliwa kidemokrasia nchini Misri katikati ya mwaka 2013.