MBUNGE WA BABATI VIJIJINI MH.JITU SONI AKABIDHI MABATI 230 KATIKA KITUO CHA AFYA GALAPO.

Mbunge wa jimbo la Babati Vijijini, Mkoani Manyara Jitu  Soni ametoa mabati 230 yenye thamani ya sh. Mil.5.6 kwa ajili ya upauzi wa jengo la upasuaji katika kituo cha Afya cha Galapo wilayani Babati vijijini.

MBUNGE WA BABATI VIJIJINI MH. JITU SONI.

Akizungumza na wananchi wa Galapo, mbele ya wabunge 6 alioongozana nao, mbunge huyo amesema anawashukuru wabunge hao kwa kuunga mkono juhudi zake na za wananchi wake kiujumla kwa kuchangia jumla ya sh.mil.1.4 kwa ajili ya kukamilisha jengo hilo la upasuaji.

Mh Soni amesema kuwa  jengo hilo la upasuaji katika kituo cha afya cha Galapo litakapokamilika litakua ni msaada mkubwa  kwani litawaondolea adha wananchi ya kwenda hospitali ya Mrara ama ya mkoa  kufuata huduma hiyo.

Aidha mbunge huyo Soni alitumia fursa hiyo pia kumshukuru mbunge wa jimbo la Kiteto Emmanuel Papian  kwa kumuunga mkono katika hatua za awali za ujenzi wa jengo hilo kwa kuchangia sh.mil.2.8, ambapo amesema msaada huo uliweza kufanikisha kwa kiasi  kikubwa katika ujenzi wa jengo hilo la upasuaji.

Akiongea kwa niaba ya wabunge wa Mkoa huo, mwenyekiti  wa wabunge, mbunge wa jimbo la Hanang Dkt.Mary Nagu alimpongeza mbunge Jitu Soni kwa kuwashirikisha katika shughuli zake za maendeleo ya Jimboni kwake, lakini kubwa lililowavutia ni uchapakazi wake.

Kwa upande wake mkurugenzi mtendaji wa halmashauri hiyo Hamisi Malinga alisema kuwa kutolewa kwa mabati hayo na fedha hizo kutapunguza  mzigo mkubwa kwa wananchi wa kuchangia  na kutawezesha kukamilika kwa haraka kwa kituo hicho na kusaidia wananchi kuondokana na kutafuta huduma mbali.

UNAENDELEA KUSIKILIZA TAARIFA HII YA HABARI